Mer hærd ols de leit sawga es wara tsu feel leit in unseram seldt dale. Se kenna shier nimme oll doh læva, mer set fort gæ, he woo's net so feel leit het. De woreheit is awver, os we de weldt ei-gericht is, huts net holver leit ganunk -- mer mawk he gooka woo mer will fahla leit. Es hut net ganunk monsleit, net ganunk weipsleit, net ganunk maid un net ganunk boova. Gæ dorich de shtodt un dorrich de shtettle un du warsht sæna dos ivverall leit fahle. De shtorra sin foll goods un de shtore-keeper hucka de helft fun der tzeit derby mit nix tsu do os worda far de customers cooma un era goods kawfa. Oll de wardt im gonsa lond hetta garn a pawr dowsend customers mæ far era schnopps drinka, un yader porra het garn a pawr dowsend g'mainsgleeder, yader shoe-shtore het garn en lot orma borfeesiche de shoe missa hovva far dar winder; yader glæder shtore daid wincha os pawr dowsend holb-nockice cooma daida far glæder kawfa; yader lawyer winsht es daid about tzae mohl so feel norra gevva de shtride un lawsuits shtarta daita; yader kucter wut os es about tzæ mohl so feel gronke gevva daid; yader drooker maned es setta about finf dowsen mæ leit doh si far si schlechte tzeidung nemma; yader weshfraw maned es setta about dri mohl so feel leit cooma mit schmutziche wesh, even dota-græver heta garn mæ dota tsu bagrawva, un yader shtodt het garn nuch a pawr dowsend ei-wohner. Des is en deitliche bawise dos es net holver ganunk leit gebt.
Awver don gebts widder feel bletz os mer mained de weldt het gons un gor tsu feel mensha un mer muss sich watcha os se em net de ribba ni renna un em dote draida. Gæ amohl on bletz woo feel tsu fressa un tsu sowfa is far nix, dart fint mer olsfart en grosse crowd -- olles is lavendich un gooked we en grosser eema-schwarm usht net so decent un so orndlich.
Gæ amohl on bolidix conventions woo a pawr empter ous gadaled wara, odder woo en blotz uff is far en appointment, woo mer geld grobsha con, awenich shtaila un awenich rawva mid ous in de jail cooma, dart sin olsfart tsu feel leit. Un gook amohl woo en fessly beer far nix ous-gadaled wart odder tsu keffer-bree ga-dreat wart, dart sin aniche minnut tzæ mohl so feel leit os note-wennich. Nixnootsiche, fardorvena, shtulsa, eibildishe, hoach-meediche, dreckiche, lousiche un u-arliche leit sin feel doh, awver recht-shoffena, arliche, brawfe, dæ-meediche, fleisiche, goot-hartziche un sobere leit sin tsu wenich, un fun selera sort kent mer nuch milluna braucha.