Husht du in dime læva draw gadenked we feel sorta si os es in dara weldt hut? Won du net husht don luss mich dere sawga, es hut mæ si os ansich ebber denka daid. De si sin divide in tswæ glossa: De fier-baniche un de tswæ banicha. De fier banicha si hen de advantage ivver de tswæ banicha wile mer se fet maucha con un essa, awver de tswæ banich sow hut gor nix far se tsu recommenda. Du consht im sama shtettle woona far tswonsich yohr un net ousfinna os du olla dawg de shtrose lawfshed mitera sow bis du amohl en woch mit anes fun denna si im sama house woonsht. Ains fun denna si sin so sour os essich un so mean os dreck dahame -- ba-usa era wiver un schlawga de kinner room -- nemond greeked en goot ward fun ena, awver usht so g'shwint os se uff de shtrose shridda don hen se en blesseerlicher gook un yader ebber maned are is de goot shtoond. Ains fun de onera si sin de woo mæna de soon daid shina un de ræga foll usht arlæ far se. Se bada Gud aw olla dawg far sich selver un won se der wind un der ræga regulata kenta don daida se era boweri in en gorda draya un eram nuchber si lond in en woldt. So karl wara nee net meed en brennende hell unershtitsa -- usht far de accomodation fun lite woo se selver glicha sæna daida farbrenna. Es hut nuch feel onera sorta si. Der mon woo olsfart om wartzhouse lite un is ready for en drink nemma awver hut nee ken geld fars selver uff-setza. Se fressa der doo-wock, schmoka de segara un drinka der whiskey os onera karls kawfa, un derno gæna se un bragga we feel reicher os se sin os we de karls woo olsfardt era geld om wartzhouse shpenda. Ich hob ken objections tsu ma mon os tsu feel fun sime geld denked fars shpenda far drom, awer derno set are net onner leit era geld helfa uff sowfa. En onery sart sow is de rigel-wake sow. En rigel-wake sow is en mon os entitled is tsu ame sits inera kar un derno shpraid are sich un si baggage ivver fier sitz un maucht de weipsleit shtæ won de kar foll is. So karls nemma generally olles os room g'hand wardt inera kar far essa, awver won se ebbes tsu fressa hen don doona sees ous em wake shoffa so shtill os en mowse. Won se om wartzhouse shtuppa don fressa se usht æ mohls dawg, un wos se net in era si mawga lawda kenna doona se in de seck far der balance fum dawg. Nuch æ sort si un ich bin fardich, un sell is de sow woo olsfart es feddersht si will -- woo ivver weipsleit un kinner nows groddled un draid se in der budda usht so os are si reesel forna draw hovva con. Es hut farleicht mæ fun denna si os fun anicha onera sort un es is umeglich far se fardilga. Education un refinement mauched se usht shlimmer un feel mæ g'farlich -- wile en ga-polishde sow on feel bletz ni con woo en commoner borrick frish ous der ben net ni reecha dariff.
De fact is, en mon kent bessera dinshta do tsu sime lond os nous gæ si sheesa un se usht farfowla lussa we se de buffaloes uff em prairie g'lust hen.