Ich hob feel compliments greeked uff my looks sidder dos ich dere my pickter g'shicked hob. De weipsleit sawga won ich uff-g'schmutzed ware we feel onera chaps daia ich gook we en gentlemon. Es hut de Polly woonerbawr ga-bleased un se is grawd gonga un hut mere en pawr nia shtiffel ga-kawfed. Es wore net os ich se so shlim gabreicht hob, awer se hut gamained es ware nuch ebbes ous mere tsu maucha won ich goot ga-glaid ware un daid uff mich ocht gevva. Des wart "ocht gevva" hut mer necht recht aw-g'shtonna, un ich hob net gawist wos se mained bis shtart nemm set un en beevil aid nemma os ich im gonsa yohr nix mæ nemma set out en Hullerheck sinera schwartze buttle. Es hut mich about hover folsh gamaucht, for es is mer fore-cooma os se yusht so goot grawd rous cooma ware mit era maining os ich tsu uft selly buttle handle. Awer wile se so nice wore un hut mer de nia shtiffel gakawfed hov ich gadenked ich wet's nemma we's coomed. Ich hob's explained wie es is os ich tsu sawga nee nix drink ons Hullerhecka -- anyhow nee net feel. Awer se hut mich draw erinnert we ich doh fergonga amohl hame cooma bin so shtarns foll os ich fergessa hob my hoot ob do we ich ins bet bin.
Well, tsu ledsht hov ich agreed mit der Polly, uff schwartz un weis mit shrives un my nawma dertsu g'signed, os ich in dem gonsa yohr nemohls ons Huller hecka gæ except won un-g'fare ebber dart is os ich garn sæna will, odder won ebbes arbordich's fore gait, odder son's so happened os nix soonsht fore gait doh om barrick os ame en chance gebt far awennich tzeit ferdriva. Ich hob aw agreed os ich im gonsa yohr kæ cent ous geb far licker odder beer, except won ich shmartza im lieb hov, odder won my narfa ous tune sine, odder won mer ebbes soonst failed so os ich ebbes nemma mus for mich uff toona. Ich hob mer awer ous g'holta os won ebber um der waig is un lawfed on der baar far de drinks uff setaz un sawgt, "Coom boova," os ich do con we ich will -- es si lussa odder aw nuff shteppa un ebbes nemma, yust far my goote monneer uff holta.
Now, konsht denka, mus ich ordlich goot ocht gevva os ich my temperance pledge net farbrech. ich bin den nummadawg aw grawd nuff ons Hullerhecka un hob's da karls dart g'sawd os ich now ob g'signed hob, un hob ena es bobbeer g'wissa. Don hut der Bill Bifflemoyer's loud galaisa, un se hen oll behawpt os mer ebbes failed; un os ich now aw grawd ebbes nemma set far my narfa uff toona.
Of course ich hob don aw anes ganumma, un der Hullerheck un oll de karls hen era opinion gevva os so en temperance pledge we meinyy is oll recht un doot nemond ken shawda.