Ich un de Polly sin em ledshta Soondawg owet nivver uff der hawsa Barrick karrich-hofe galuffa. Ich wore nimmy druff g'west far tzæ yohr un ich con dere sawga es hut mer laid gadoo de socha sæna we se dart sin os ich gawiss far a wile nimmy gæ.
Du huscht ols der oldt Billy blotner gakent -- me Sam Bltner si grose-dawdy? Huscht net? Well, yader ebber wase wos far en gooter aldter drup or are wore. Nemond hut hoongers-note um ene room galidda so long os are galaibed hut. Are hut en shæne boweri g'hot un duch is are om end derfun by em shreef ous-farkawfed warra usht wile are nemond nix refused hut so long os are ebbes g'hot hut far sich selver. Feel leit hen advantage ga-numma fun sime grossa hartz un hen eme socha ob-galoused bis are selver nix g'hot hut. Derno hut are si boweri gamorgaged tsu'm Sam Keisling. Der Sam wore anes fun sella grop-sicha si woo olsfart reddy lied mit a pawr hoonert dawler usht far so awremy oldte karls we der Bill in en eck greega. Es hut ene usht en yohr ganumma bis are em oldta Billy si bowery ga-agened hut, un se hen der oldt Billy uff's township gadoo.
Ich hob der oldt Billy uft p'soocht noach dem os are uff em township wore. Are hut olles aweck gevva g'hot except si hartz -- un sell denk ich het are aweck gevva won's net tsu grose g'west ware far en ordinary mon. Oll de kinner in der nuchbershoft hen ene gakent un sin cooma ene p'soocha. Won ebber eme en shæner obbel gevva hut don hut are ene g'holda far de kinner, un won se cooma sin ene sæna don is are mit sime shtuck ena noach g'hobbled dorich de felder un ena helfa blooma soocha. De helft tzeit hut are ken hoot uff g'hot un der wind hot ols si wisa hore in rechte waravela gadraid. Endlich is are g'shtarva. Ich wore on sinera leicht. Es wora nuch about en holb dutzent onera on der karrich. Even de freind sin net by cooma. Der porra hut en kartze breddich gadoo. Si text wore ebbes wæga da Kinner Iserawl we se ols bodder-reeslin g'fonga hen in der woldt, awer are hut ken goot wart g'hot far der awrem oldt Billy, un nemond hut g'hiled except a pawr bore-feesicha kinner os im hinnera eck fun der karrich g'hucked hen. Ich wore anes fun da grawb-maucher un bin ga-oddered g'west si grawb ins hinnersht eck fum karrich-hofe do. Em ledshta Soondawg hov ich's widder p'soocht, awer ich hob's shier net finna kenna. Es wore ivverwoxa mit u-growd un orrick ei-g'folla. Om kup end wore en glæ bordly un doh wore si nawma un eldt druff g'schnitta. Ich wase net ware's boardly uff hut far ene, awer's hut ga-gooked we boova araweb un ich denk es wore aw.
Ich bin aweck fum blotz mit ma schwara hartz, awer es hut net long g'last. We ich forna on de fense cooma bin don hov ich en grosser shaft fun marvel sæna shtæ. We ich naixt cooma bin don hov ich g'sæna os es em Sam Keisling si grawb is. Der Sam hut em oldta Billy si bowery ob-galoused, awver are hut se net long enjoyed. Are wore en shalooer karl un hut ordlich geld by-annoner g'hot we are g'shtarva is. Are hut net selver g'shoft, awver won are an chance greeked hut on en awremer mon don hut are uff eme g'hucked we en bloot-sookler bis are olla cent g'hot hut. We are g'shtarva is hen se dri porra g'hot un de hen ene so weit nuch em himmel g'shova os se hen kenna mit da hend un derno hen se ene gapushed mit shtonga. Ich denk se hen ene nuff greeked, un won se net hen don hen se anyhow era hoonert dawler's shtick far-deened.
Der Sam hut now en monument os ivver en dowsend dawler gakusht hut -- nine-un-ninetzich per cent. bloot-geld denk ich. Es is olles fargritzled mit schriftliche warda un won mer's læsed don daid mer denka are het shunt de floos-fettera g'shtart far en engel wara eb are dote g'west wore.
Now, weller fun denna tswa mon denksht du os es arsht in der Himmel coomed? Ich hob nuch en oldter Shponisher dawler os my grose-mommy mere gevva hut mit era yohrtzall druff, un ich wet seller os der oldt Billy druvva is un fardich hend-shiddla eb der Sam Keesling ous-findt os ebbes loos gabrucha is.