Boonastiel - T. H. Harter, 1904

De Hoyet.

De hoyet is widder doh un in a pawr dawg hara mere widder der reeper robbla. Es wore ols en grosse blesseer yora tsurick un de hoyet wore ols en rechte frollick wile fremmy leit uff de boweri cooma sin un mer hut en chance g'hot far tsu ebber soonsht tsu schwetza onshtads de gile un uxa. Doh sin ols de leit by cooma mit era sensa un sin dorich der dick glæ gabawda os es en rechter lusht wore. Un wos karyose socha huts duch als gevva. Unich em grossa shodda bawm om end fum feld hut de shtitz g'shtona un won mer der deckel uff g'manched hut sin de hoyshreck ni gajumped os won se aw drinka wetta. Naiva draw unich ma wishly hoy wore de buddle mit em goota oldta drom. Un wos wore sell aw drom! Whew! Es wore fum shtuft os em in de bæ gonga is un hut em shtarrick gevva, un kens fun dem forty-rod rodda-gift wos em olla-weil de shoe-sola ob-brendt un de tzæ neggel ob-reised os wie en gwidder strawl. Un wos hut mer schwitza kenna uff sell shtuft. Ah! Oldter shpeck! Es tzæ uhr shtick un es middawg essa. Schwetz wæga dina downsend dawler pianos un di finf downsend dawler pipe organs! Selly oldt dinner bell uff em weh-house hut net ivver en dawler un a holva gakusht awer es wore mæ moosic in era os in der gonsa fardihenkerta shootin'-match os se now in era high-falootin karricha hen. Un wos hut mer en obbadit g'hot! Olles hut goot g'schmocked, und ich daid now en gonser dawg fens maucha far usht nuch en shtick fun sella karsha-boy odder leb-koocha woo de mommy ols gabocka hut. Nochts hut mer en jollification g'hot un harley ebbes g'shlofa, un morgets widder free on de arawet un der gons dawg fardt g'shoft un harley on meed wara gedenked. En holva dawler der dawg wore en gooter loo, un de leit hen besser galæbed os se ollaweil doona. Of course es hut net yader ebber en piona odder en organ g'hot far de maid druff drooma de wile os de mommy gamulka hut, awver de maid hen feel socha g'hot os se now net hen un sell wore g'suntheit un rhoda bocka. Se wora dick un fet un hen de gichtera net olla fier-un-tswonsich shtoond greeked. Se hen evva sella-mohls net sich mit hoy-shtrick ob gabunna os se gagooked hen we schwartze weshpa. De boova wora tsu fritta uff der boweri un hen net oll ducter un lawyer un porra si wella. Ollaweil won se amohl der multiplication table sawga kenna don wella se shunt nimmy uff der boweri bliva awver wella ins shtettle far tzooker weega un uff em counter room hoopsa, un kit hensching un shtand-up collars wara.

Yaw, de goota oldta tzeida sin farby. Si sin gonga mit der reff-sense un der sichel. Now doot der bower un si knecht de bisniss. Olles is machinery. Der repper doots maya, der hoy-recha doots uff wind-roya un de hoy-govvel nembts uff der shtoll. De hoyet fongt aw Moondawg morgets, un by Somshdawg mitdawg is olles far-ivver un on dri uhr hucked der bower shunt uff der longa proch ons Hullerhecka un wardt far ebber cooma un ene haesa drinka.

Ich un der Billy Bixler hen usht der onner dawg derfum ga-hondled, un mere sin tsu der conclusion cooma en mass meeting roofa fun da shoff-leit om Hawsa Barrick un en shtrike declara. Mer sin willins on ma dawler der dawg shoffa won der grook widder on der oldt blotz g'shtelt wardt, odder tswæ-un-a-hova won mere unser aguer licker finna missa. Yader ebber wase os ich anyhow nimmy shoffa daid wile ich shunt tzæ yohr om shtudia bin far along cooma oona sell, awer ich daid en shtarnser gooter Bresident maucha wile ich en gooter schwetzer bin un con da leit mæ sawga in anera shtoond os se able sin tsu glawva in ma gonsa yohr.


Valid XHTML 1.0 Strict Valid CSS!