"Wos gebts mit unsera boova?" hut mich en oldter friend g'frogt der onner dawg. "Se wara olla yohr schlechter, un wons nuch a wile so fardt maucht gait olles ts'um divel." "Now, holdt amohl," hov ich g'sawd. "Denksht du de weldt is shlechter un unser boova ma u-bennich dos se wora we mere yung wora? Waisht du net we es wore yohra tzurick. Won en arn ob tsu maucha wore, en shire uff tsu shtella, odder en fendue im lond? Doh is es net druff-ga-gooked warra tsu'm mon woo de besht larnung hut g'hot, odder de shensht hond shriva hut kenna, awver tsu'm mon woo der graisht bully wore un hut es mensht drom drinka kenna. Olla wile won en karl fecht odder wardt badrunka on doona de leit sich shia far eme un de maid woo gooter fershtond hen gevva eme der henshing. Meinsht du nuch we mere em Fridder Honsmike si arn ob ga-maucht hen mit da oldta sichel we g'suffa os du worsht? Of course du waisht nix derfun. Du worsht tsu g'suffa far ebbes tsu wissa, awver we mere dich hame g'feared hen husht du dinera mommy garoofa far cooma un dich ous der growd soocha so os de onera hame gæ kenta." Es hut em oldta karl en farflompter ribba buffer gevva. Luss mich dere sawga, des ga-gloose by denna oldta chaps we goot os se wora is oll wind. Ich denk de goota boova sin oll g'shtarva we se yung wora. Ich hob anyhow in mim laiva ken lavendicher g'sana, awver ich lase fiiel fun ena in da Soondawg Shool bicher. Ich denk se sin oll g'shtarva. Es hut mich shunt uft ga-woonered dos ich so oldt bin worra.
De grose froge is, wos wella mere unser boova larna? Mere missa se arsht farstay. Won aner goot is om gride shneida un licorice-wasser maucha don set are es duckter hond-warick larna, won aner sawga con eb gile feel hovver greega om misht don set are en veternary surgeon gevva, won are charga con we olle sobberment un leega we der dihenker don set are en lawyer gevva, won are laiva con we en engel uff nix don set are es porra hond-warick larna, un won are tsu schwach is far an bower, derno set are es drooka larna.
De signs doona shier olsfart ous holda, a wake odder der onner. Ich hob amohl en mon gakent dos si boo broveera hut wella uff so en wake. Are hut der boo in en shtoop g'schlussa woo nix wore os en Beevil, en obbel un en dawler. In a pawr minnutta is are in de shtoop gonga. Are hut si mind uff ga-maucht won der boo der obbel est don date are an bower gevva, won are de Beevil laist don date are en porra gevva, un won are der dawler ga-numma het don daid are en banker gevva. We der fodder nei cooma is hut der boo uff der Beevil g'hucked, der obbel gessa un der dawler im sock g'hot. Seller boo hut en first-class politician gevva.