Boonastiel - T. H. Harter, 1904

Es Rodda Nesht.

Ich hob shunt g'hard os rodda anonner de schwentz ob fressa in kold wedder won era fooder ous-gebt, un ich hob shunt uft gadenked os sell der foll is mit menscha. Doh ons Hullerhecka wartzhouse is so an rodda-nesht. En gonser winder hucka se hinnich em uffa un schwetza wæga olles os awgaid. Ken weips-mensch is sowver os de shtrose lawfed, un won se shtuppa set un anes fun da rodda friendlich bawilcooma don sin gli en holb dotzent uff era g'shpoor. Won en monskarl net tsu da rodda kared awver gaid sinera bisniss noach, batzawled si agener tox un shoolda un enared si familia, don tzeega se en ob about olla onera dawg. Won ols es free-yohr commed don gæna de rodda ausanonner. Yader ebber is froh won ols der summer coomed so os de rodda nows shpringa kenna in de felder un awenich wætza somla far era familia. Won se shoffa don schwetaz se net so feel un de besser gloss fun leit hen rue.

Ich wore der onner dawg om rodda nesht ins Hullerhecka bar-shtoop. Dart wore der Mike Blotner, der Bench Hess, der Jeck Hawnayarick, der Bill Michelroyer, un der Sam Seeshuls. Se hen ivver yader ebber nows g'mauched os der wake cooma is. Es wore ken goot ward g'sawd far ken mensch -- nemond hut nix rechtes gadoo g'hot un yader ebber wore en keyune, en schpitz-boo, en loomp un en raskel. Endlich hut der Mike Blotner g'sawd:

"Ich wooner wos de leit wæga uns sawga won mere net derby sin?"

"Es woonered mich aw," hut der Bill Michelroyer g'sawd. "Supposin' mere daida amohl unser agny opinions expressa wæga anonner; grawd de pinklich woreheit sawga wæga nonner os we mer daida won mere net doh warra."

"Well," hut der Sam Seeshols g'sawd, "Ich ware drin derfore won nemond base daid warra."

"Never mind," hut der Bill Michelroyer g'sawd, "mere fixa sell. Der arsht os base wart muss es uff-setza fars house, un mar maucha der Gottlieb Boonastiel doh der judge. Mer wissa oll unser schwach-heita, und es daid uns goot cooma als ebmohl unser failer hara. Ich geb nix droom un gæ es arsht uff der shtand un derno will ich hovva os der grawd rouse schwetzed. Hold nix tzurick. Ich hob nix tsu farsheteckla un ware ga-wiss net base."

"All right," hut der Bench Hess g'sawd, "shtell dich dart ins eck un horrich."

Der Bill is ins eck g'shtepped.


"Kensht du der Bill Mickelroyer?" hut der Bench g'rogt.

"Yaw," sawgt der Mike Blotner, "se hasa ene ols ebmohls der Bulla-Royer, wile are amohl en bull g'shtola hut un ene gamesht un farkawfed far si agener!"

"Sell is en-------leek!" hut der Bill ous em eck ga-grisha.

"Toot, toot, Bill, " hov ich g'sawd, "du farleersht de drinks."

"D------- de drinks! Sell shtand ich ------- net!"

"Se sin usht in g'schposs."

"In g'schposs? Hoons boona! Se sawga in g'schposs was se in arnsht mana. Selly bulla shtory war fargessa un se bricha now so older dreck net widder uff shtarra."

Ich hob ene endlich gadishtered greeked un der Jeck un der Jeck Hawnayarick hut widder ow-g'fonga:

"Es wase neemond we der Bill si geld g'mauched hut."

"Ich wase we are en honnert un tswonsich dawler g'mauched hut," sawked der Sam Sheeshuls.

"We?"

"Are hut's ga-collect far de karrich uff-fixa we are fore-shtaer wore un hut's si laiva net ivver-draid."

Der Bill is on der wondt in die hæ g'shprunga os we en maltee kotz won se de gichtera hut, un mit ame joomp is are mere ivver my oxel nows un de naixt minnutt hut are der Sam om hols g'hot. Se sin ivver dish, un shteel, un benk nows garulled os we tswa wol-shtraimicha kawder, bis endlich hut der Sam "ganunk" ga-grisha un mer hen se ausanonner.

Sell hut de experience meeting uff ga-brucha im rodda-nesht far seller dawg, un mer hen ous ga-maucht os yader ebber hut arawet on sich selver tsu wesha won are si agener karraber sowver holdta will.

MORAL: Won olla mensch si gonser lavens-lawf uff de shtarn ga-drooked het don daida fiel leit era heet net ob in der karrich.


Valid XHTML 1.0 Strict Valid CSS!