Ich wore der unner dawg drows farella fisha un ich hob ebbes g'sæna os mich ordlich hardt denke hut maucha. Es wora dri farella in ma luch. Tswa glæna un en grosse. De grose, denk ich wore de mommy fun da tswa glæna. Se Hut anyhow ocht gevva uff se os we en mooder doot uff era kinner. We ich ons luch comma bin sin se drin room g'shussa os we wedder-laicha. Ich hob mich hinich en bluck g'hucked un gawardt bis se sich widder g'settled he un derno hov ich my fly uffs wosser g'schmissa. Anes fun da glæna is bletzlich ruff cooma far de fly fonga, awver se hut se farfailed. Now en fly is nix os a pawr hinkle federa on en fish-ongle ga-bunna so os se gooked os we en fetty oldte g'schmase mick. Gor nix goodes far fish tsu fressa awver se gooka shæ. Ich hob widder ni g'schmissa un de oldt mommy is ruff cooma, de fly bagooked, un derno widder shæ tzurick un sich naiva era kinner g'hucked. Se hut g'sæna os es usht en humbuck is awver se hut gawist ous arfawrung os es g'fareliche bisniss is far um selly fly room foola, un ich hob se sana era kinner en lecture gevva. Se hut, so hov ich g'tzailed, se ob-gaworndt, un ena ous galaiked we easy os se in druvel cooma kenta won se net era finger derfun holda daida. Se hen era tsu g'horriched mit so grosser ochtum os ich ga-glawbed hob ich kent kens fun ena fonga. Ich hob widder ni g'schmissa un es hut kens sich gagooked hut we en eme. Sell hut de glana grawt uffrearich g'mauched un se hen mit divel's g'wold draw wella, awver de oldt wore now shure os es en hoax is un se is ovvich era kinner room g'schwuma un era floosfeddera g'shddled os won se orrisck excite ware. Ich hob sæna de kinner mit era mommy ariga os won se mæna daida se wista besser, os wons shawd ware so en grosse, fetty eme full hoonich fardt gæ lussa -- un es ware anyhow ken shawda far broveera -- "so bots nix so shots nix." Ivver a wenich hut de oldt mommy en onera wake nows gagooked, un so g'schwint os en wedder-laich is anes fun da glæna in de hæ g'suhussa un de naixt minnut wore se in mime korreb. De oldt farrel hut ga-dobed os we en weedicher bull-hund, awver ich hob grawt widder ni-g'schmissa un ivver a wennich coomed de onner glæ farrell ruff un ich hob era mowl ous-g'schlitzed awver hob se net greeked. De mooder wore droverich. Ae kind dote un es onner ga-gribbled, usht wile se g'maned hen se wista mæ os de mooder.
Ah, doh wore en lesson. Yunge maid sin di farella. Se gooka far flies. De mooder sawked, "Gebt ocht, dare mon is nix nutz. Si feddera sin shæ awver si hartz is shtawl. Are will eich usht fonga. Doh is g'fore, un 'ware sich in de g'fore gebt coomed drin um.' Horriched now -- lust ene gae."
"O mommy," sawga de maid, "are is so shæ os en engel un so sees os hoonich. Es con nix letz si far mit eme awenich uff der shtrose room flirta. Dere sint tsu partickler," un de wile os de mommy shlofed nemma se de ongel. Won set net g'fonga warra don warra se anyhow gagribbled, un era læva end mit druvel un sorga.
Geb ocht uff der mon woo shæna feddera wærdt for en shtawla hartz tsu decka.