Husht du in dime læva en engine examined? Won du husht, husht du ocht gevva os de glæna redder woo de machine driva es wennicht yocht maucha? Es flyrawd dess broomed un blossed un schlocked room un mer maned es daid es gons ding im gong holda, un duch daids ken tzol moofa wons net ware fer de glæna, shtilla redlin unch der engine os mer shier net sana con, un os olles mit schmutz farschmeared sin.
So is es mit da leit. Won en movement g'shtart wardt don sin olsfart a dale os es bloosa doona, fleega room, un maucha en fuss os won se de gons machine wara -- un de fact is, se soona gons wenich oony se hen era seck galined mit goode pay for olla move os se gamuched hen. Se managa os alsfart era nawma far da leit is -- eb se es hara wella oder net. Se kenna's denk ich net helfa. Es is en gronkheit os se hen far wolfly notoriety, un ich denk es daid se dote maucha won nemond ena helfa daid era reputation uff holda.
Du konsht der unershit sana on der grick. Woos wosser deef is harsht do ken yocht. Dart is woo de grossa fish lia. Derno gæ on en riffle un dart harsht do awver en yocht. Doh is es wosser din un du finsht doh de suckers.
Nem en barl un fills mit sond un rulls en hivvel nuner. Doh harst ken yocht. Nem derno der sond rouse un do a pawh walniss ni un du mainst der divel ware lose gabrucha won du's der hivvel nunner rulsht.
Es is net der mon woo der grose racket mauched os de feel arawet doot. Es is der shtill mon woo net de tzeit hut far si nawma tsu schpotseera far da leit os de bisiness doot. Der mon wo arlich, uff-richtich un hardschoffish is brouch si nawma net adfertised greega. Are adfertised sich server. Seller man shoft far character. Der onner shoft far reputation. Es is en grosser unnershit g'schwisha character un reputation. Character is wos en mon really is. Reputation is, wos de leit mæna os are is. An ounce character is mæ wardt os en kar-load reputation, un en mon os mæ concerned is in sinera reputation os in sime character dem konsht du net drowa noch tzæ uhr in der nocht. Won en mon gatempt is far lets doo un are gooked dere ins awk un sawked: "Ich kons net doo. Es is net recht," don nembt der divel en hinera sitz. Sell is character. Won are awver sawked, "Ich darfs net do, ich ware ous-g'funna," don look out! Seller is bong far si reputation, un won der wake clear ware os are net ous-g'funna daid wara don daid are de guldna benner shtæla on der Himmel's deer un der naixt Soondawg widder es nochtmohl nemma we en general.
Awer so is de weldt. Es nembt olla sort leit far se filla, un es sin about fartzich per cent. schlechta in der lot, awver fun olla denna schlechta baheed dich fum mon os si nawma peddled os we en pohawna si schwontz -- olsfardt in der hæ won are denked os ebber gooked.