En shil-grut. Husht se shunt badrocht? We wooner shæ is se gamaucht. Se is ken fish, ken fugle un ken fee. Se con lawfa, schwimma un shpringa, un es besht fun oll, se con era mowl tsoo holda. Se hut fier bæ un olla bæ hut en nawma -- shil-grut, dril-shut, tud-mortal un snorting-tapper. Won es fodder æ house hut far yades fun sina kinner don is are reich g'hæsa, un duch is de shil-gruit feel beeser ob wile se gebora is mit eram house uff em buckel -- un en shenner house os mensha hond arshoffa con. Des house holdt se so long as se læbt, un ken lawyer con en mortgage druff greega, un ken shreef cons era forkawfa. Es kusht se ken rent, ken tox un ken insurance. Es is fire, wasser un burglar-proof. Won de soon shined con se's usa far en umbarell, wons dunnert un regered tzeeked se era kup un bæ ni un is perfectly drooka. Se hut net feel tsu sawga awer hucked im fens-eck en gonser dawg un farwiled sich mit era agena gadonga. Won se gæd hoonda don nembt se era house mit sich un hut olsfart era æga bed far drin shlofa. Won en mick derwake coomed fongt se se, nembt se ins house un frest se oll uff amohl. Sie brauch net shoffa. In fact se is en loafer -- awver se batzawled era arlicha shoolda un wase won tsu schwetsa. Se hut gor woonerbawr feel advantages ivver der mensch. Won ebber coomed se b'soocha os se net gleicht don con se usht era kup ni tzeega, de deer shleesa, un nemond wase os se dehame is. Wons house-butsa aw-gaid don con se sich eishleesa bis de fraw fardich is shelda un derno con se rouse cooma un sæna we shæ os olles ga-wiseled is. Won en g'suffner mon coomed un læged era ous we boll os are si tzeidung batzawla daid don con se usht ins house gæ un worda bis are era es geld unich de naws sheebt. Won se in de karrich gaid un der shtore-keeper, woo da awrma leit fartzæ ounce tzooker tsu der poond gebt, fongt si fartzich yord gabade aw woo are shunt fartzich yohr nimmy gawexeled hut, dun con se usht era kup ei-tzeega, er shlissel draya un shloafa gæ bis se es Sockdolligy singa. Won se der foreshtayer sæd cooma mit em glingle-seckly don con se usht der kup ei-tzeega un aw-lussa os won se net dahame ware bis are farby is, un won se im shtettle is uff en Soondawg un de boova un maid cooma fun der shool un mæna se wista olles un wissa duch net ga-nunk far sich tsu bahæfa in reshpectably society, don con se era kup ei-tzeega un heila un neemond con sæna de dræna cooma.
Yaw, in fiel wæga hut de shil-gruft der fore-tzook ivver der mensch. Se brouch ken millner, ken schneider un ken sho-maucher bill batawla, -- gæd bloot-keppich, bawr-feesich un gons nockich es yohr room un duch wardt se net kold. Se agened de gons weldt un setzed era hause onna woo se will. Se wardt uftmohls en hoonert yohr oldt wile se ken ducter-shtuft nembt, un won se schtarrebt don lust se era house doh, awver es tzeeked nemond mæ ni. Se maucht ken willa un lust de lawyer es tswa-banich fee melka. Se lust sich net fargrawva awver wardt bis de u-mensa se ous em house drawga, un wæga dar naixta weldt bekimmert se sich net wile se usht frogt far gæ-galust warra.
Mer con feel fun der shil-grut lærna. Se coomed in ken shtride un lust yader ebber gæ. Se wase net woo se hare cooma is un woo se onna gait, awver de wile os se doh is broveered se es besht do os se con, settled era accounts uff we se gaid un attend shtrictly tsu era agena bisniss.