"Ein bissel unsin don und won
Is onganame by yadem mon"
Liever Kernel Harder:
Kensht du mich? Ich bin der Boonastiel! Dale leit sawga ich ware net gons recht g'scheit. Ferleicht bin ich aw net. Ich bin evva so gabora un cons net helfa, awer 'sis en oldt shprich-wardt os "de kinner un de norra sawga de woreheit." Fiel leit hen shunt long gawunered ware ich bin un ich hob mere fore-ganumma dos ich se nimmy lenger im dunkela holdta will un ich bin nuff tzu'm picktermaucher un hob mich ob-nemma lussa. My glæder sin net was se si setta, awver my dawdy hut als 'gsawt: "Besser en shtickly brote im sock dos we en fetterly uff em hute." My shtiffel blicka de tsæe, awver de Polly sawgt es ware g'sunter im house won ich se ols ob nemma do ovets so long os my tzæ luft hen dorrich der dawg. My hussa sin dorrich der greek gemaucht warre. De grose-mutter hut se ous flox gamaucht un hut de brech-ogela net oll rous ganumma, un won du in dime lava warickena hussa gawora husht don waisht du we dihenkers os se grotsa doona. My ruck is uff de oldt General Jackson shtyle und is en negel-rupper. My hute wore amohl en shtitsa hute, awver sidder os de Betz Hullerheck sich druff g'hucked hut on der schnitzing gooked are we en tzomma gadoublede accordeon. Es hut mich base gamaucht un ich hob era g'sawt se het wissa kenna os der hoot se net fit on sellem end.
Dail leit hen aw shunt g'frogt woo ich woon un woo ich hare shtom. Ich bin en soo fun Grishtuffel Boonastiel. Are wore en grosser mon in sinera tzeit -- wore en melitz officer om badolia, un wore dri mohl en jury-mon hinner-nonner-noach. Are hut on ma gretz-wake gawooned os se eme noach g'hæsa hen. Der greitzwake is nuch dart. Ich wore gabora we ich gons yung wore un bin so uff gawoxa mit em onera fee. We ich uff eld wore bin ich uff my agner hook gonga un hob rinna fum barrick g'schlaifed mitera uxa fuhr. Der drit dawg is es mere ferlaid, de uxa sin mer shtridich warra un ich hob nimmy g'wist we se hame greega. Endlich hov ich en patent-recht invent far de uxa gæ maucha. Ich hob mere en grosser dishtla-shtuck greeked un bin uff der soddle-ux gagroddled. Derno hov ich mich tzrick galawned uff eme, hob si schwontz uff g'hova un hob dare shtuck shæ drunner galaiged. Ich con dere nix feel wider fartzæla. Ich wase os mere der barrick nunner sin os we en gwidder-shtrawl. De hecka un de greena donna hen my glæder in shliverra un fetza fun mere garissa un endlich bin ich umechtich warra und bin runner g'folla. De uxa sin fart un ich denk se sin nuch om gæ.
We ich tzoo cooma bin wore ich in ma house im bed un en shæ, schwartz-awgich, rhode-bockich maidel hut de micka fun mere g'holda. Ich hob g'frogt wos es gevva het. Se hut g'sawt de uxa wara dorrich gonga mit mere un hetta mere wæ gadoo. Ich hob grawd on der dishtla shtuck gadenked. Derno hov ich g'sawd:
"Woo bin ich un ware bisht du?"
Du bisht in der Wildfraw Shively era house un ich bin era duchter"
Kernel, sell wore my arshte meeting mit der Polly, awer net de ledsht. Du waisht's ivverich.
Mere woona now om Hawsa Barrich, im Hullerbeera township, United States of Columbia. Won ebber mich finna will don gaid are ons Hullerhecka wartz-house un fun dart findt are en gooter pawd naiva om barrick nuff bis on unser house. Es con nemond der pawd farfaela wiles full farbruchena buddla naiva hare leit.
| GOTTLIEB BOONASTIEL |